Meets mëku’uktëjktë, pujxtë käjptë, ayukjää’ytyë, meets ëxäm myikmëkäjpxtëp, jam ëëts ntsëëny mä ja Servicios del Pueblo Mixe, jats ëëts nminy jëts ëëts njä’äty mä yë jëën mä yë pujx yikmatmatëy.

Maktu’uk änp yë myëtëkëëpë po’ ja tsëyëpë ja myëjkutunk, ojts tnëkajpyxy tnëmtyä’äky ku ja pä’äm të naxkitä’äky yä naxwiiny yä naxkijyxy, miti’ xyëëw covid 19 (coronavirus).

Jatë’n ja ääw ja ayuujk ‘yukwä’äny, ku ka’ yë yuuj yë pä’äm yä jyä’ät mä atëm ntsënää’yëntë ntanää’yëntë. Ixats yik’ijxy yiknäjawë ku ja pujx ku ja käjp wënääkën të pyaatyëtë.

Yë tsëytyääjk miti’ yikmëët’äjp yä ayukjää’y’yetjëëty, ka’ tmëëtë ja këpëk, amääy ja tsëy, nayë ka’ap ja jëën ja pujx miti’ yikta’ejxpätp yë’ëpë pä’äm.

Paty myik’amëtowtë myikpëktsowtë, pujxtë käjptë, wan nixem wan nëyäm tnay’ejx’ijytyëntë, jats kitiipë myëwenë kyajaa’ë yë’ëpë yuuj yë’ëpë pä’äm, jatë’n säm ixaa wyënääkën ja kutunktëjk mëët ja pyujx mëët ja kyäjp tanëpäätë ja ejx’ejtën ja napya’ayoo’wën: ja wë’ejxën ja wëtëkäjtsën mä nëë’ mä tuu’, tyik’awejxtë ja xëtuu’nën, tyik’awanëtë ja määy’ejxën ja määypyääjtën, jats ka’ap ja mayjää’y nyamyukyëtë.

Wants mëku’uktëjk ja ääy ja tsëy nayëtë’n tpawënmää’yëntë tjäämyejtsyëntë, ja kaaky ja tojkx miti’ ja tety’amëj ja täk’amëj të xukjë’ijxyëntë xukpa’ijxyëntë, wan tmëjpëktääkyëntë, jats ka’ mpawënmääyëntët ja juu’yën ja käjpxën apiky.

Wan nëxem wan nëyäm tnapyutëjkyëntë, wan tyikmëjtääjkyëntë ja amukkë äjtën, jats jatë’n nyiknëkaxë’këntët ja n’ayukjää’y’äjtën.

 

Lengua Mixe, variante de Tlahuitoltepec.